Carnilevaru mio pecchì si muortu. 'A tiritera, chiantu de Jugale di Giulio di Malta

Assettatu supra a panchina de via Plebiscitu, vicinu a Gghiesa e San Franciscu, u povaru Jugale se facie lla pinnichella ccu nu gruossu panaru chinu de ogni ben de Diu (sazizze, supressate, nu gruossu capeccuollu e nu varrilicchiu de vinu de na trina e litri de vinu Savutu), in attesa du cumpari suo Carnilevaru.

Sagliendu da Massa, ere supra postu de sie da matina, ppecchì, ccu l’amicu du core avianu decisu de festeggiare alle Paparelle ccu nna grande mangiata e vivuta dintra u magazzinu depositu loru. A duminica matina, dopu a juta alla missa, u guagliune, visitandu i tanti amici, avìe ricuotu nu saccu e cibarie e quindi ere in attesa, nu pocu siccatu e soprattuttu ncamatu. Naturalmente, dati i rapporti fraterni e di lavoro di decenni, Jugale, ere certu ca, quantuprima l’amicu, arrivave ccu atra bona rrobba ricota qua e llà. Naturalmente, come suo solitu, ere sagliutu da Massa a prima matina e non era nnu problema l’attesa. Alle dieci e quaranta, u cristianu, vene risbigliatu de na piccola fulla de gente ca ragavedi a manu na longa casciotta de tavule d’abete e gridave e se disperave. Incuriositu, u povaru Jugale, se du nna risbigliata, s’avvicine allu gruppu e mintienduse e manu alli capilli, cumince a gridare puru illu. Dintra nu tavutu fattu alla bona, senza cuvierchiu, c’ere l’amicu “Carnilevaru” ca l’amici stavanu portandu alla Gghiesa ppe llu funerale. N’abbuffata storica consumata Lunedì quattro durante a notte era stata fatale ppe llu povaru “Carnilevaru”. Ppe llu povaru Jugale è una mazzata tremenda. Se rasche, strepitije pue cumince nna “tiritera” straziante, na cantilena ca strappe lacrime a josa cantandu ad alta voce.

Dedicata ai “Quattru Aironi “da Chiazza Suttana”, Peppe, Gatanu, Giuliu e Mariu.

A TIRITERA CHIANTU DE JUGALE

“CARNILEVARU” mio ppecchì si muortu!
Ppecchì m’ha fattu chissu grande tuortu!
Te si abbuttatu troppu e carne e puorcu,
senza catreia un se pue fare “l’UORCU”.
Chine t’ha fattu fare, arrassusia,
ere miegliu ncamatu la via, via.
Troppu attaccatu a cavulu e stirgliola,
giuvane, t’a jocatu la mazzola,
ngurdu te si abbuffatu de sazizza,
A “Fauce” t’a distruttu ccu capizza.
T’hanu jettatu dintra nu tavutu,
ccu nnu carracchiu e vinu du Savutu.
Alla “Massa” te chiangiu io, “Jugale.”
“Carnilevaru mio” si nnu Gramale.
Carnilevaru mio ppecchì si muortu!
Mò nu nde tuocchi cchù carne de puorcu.

di Giulio di Malta, Cosenza 4 marzo 2019

Vedi anche:

• http://aiellocalabro.blogspot.com/2017/02/una-lettera-in-diavolettu-dajiellu-al.html
• http://aiellocalabro.blogspot.com/2018/02/a-mario-pucci-i-versi-di-giulio-di-malta.html