'A strina aiellise, di Franco Pedatella

‘A strina aiellise (di Franco Pedatella)

Sîmu tornati tanti a stu paise
ppe stare ‘n festa ‘nziemi ‘ntra stu mise,
ne sédere alla tavula a mmangiare
e stȃ ‘na picca allegri e ffissiare.

Me vene urdure ‘e fungi d’ ‘a muntagna.
Speriamu ca ‘un finisce sta cuccagna,
ppecchí d’ ‘a casa vene  ‘e za Maria
profumu ‘e pane e ccarne. Cchi gulía!

S’è rresbigliatu stu paise biellu,
‘un mande cchiú ‘a malaria ‘u Mariciellu:
campenu tutti ed ogne quatrariellu
sumiglie a cchistu santu Bumbiniellu.

Ppecciò curriti allu tavulatu,
‘ndo’ cc’è ssazizze, pane e ssuppressate!
Portati ‘e sutta ‘m  pundu ‘u magazzinu
chillu varrile ancore chjinu  ‘e vinu.

Ppe ffesteggiare stu biellu Natale
e ‘nnu Bon Annu nuovu v’agurare,
sîmu venuti cca ppe be cantare
sta strina ca intra ‘u core fa scialare.

‘E fimmine d’ ‘a casa sû  ‘e regine,
i quatrarielli àrmenu  ‘mbuine.
I patri, ca d’ ’a casa sû i regnanti,
‘a tenenu luntana d’ ‘i briganti.

Piglia  ‘a farina frisca d’ ’u mulinu,
fammícce tri tturdilli ccu llu vinu;
‘e mulingiane falle a ppruppette,
ca po’ me tiegnu ‘m piedi ccu llu vette.

‘U furnu de ddon Cicciu e Vvucaturu,
chillu d’ ‘A Praca senza stutaturu
‘mpúrnenu pane a ggara e a fuji fuji
ppe nne carmare ‘a fame a ttutti nui.

Vida ca ‘e castagne sû ccunchjute!
Fammícce quattru vallani vulluti!
‘U riestu fallu stare alla fiammella,
ca ne mangiamu puru ‘e roselle!

‘Mbísc-checce puru i rangi  d’ ‘A Cappella,
fammílli benedî d’ ‘a Madonnella,
e i pimmaduori de sta Macchja bella,
ppe mm’ ínchjere de cchjú sta panzarella!

Portame puru ‘u piattu d’ ’e surache!
Sulu a penzare, ‘u core mi s’annache.
Ma cotte intr’ ‘a  pignata de Vurjile!
 Mi nde mangiasse quantu ‘nu vacile.

Ppe mme sciacquare ‘a vucca  ‘nu momentu,
‘na guccia d’acqua cacce ogne tturmientu.  
 M’ ‘a puorti intra chillu cucumiellu
de grita de Vurjile ch’íe dd’Ajíellu!

‘A nive è scisa già ‘mberu ‘A Zinetta.
Curra a mme fare priestu ‘a sciribetta!
‘U miedicu ‘u salutu de luntanu,
le dicu “bonasira” e vaju chjanu.

E nnun te riscordare d’ ‘i viscotta,
ca mi nde mangiu tri tutti a ‘nna botta!
Te raccumandu, chilli de Melina,
ca i miegli sû dd’ ‘i munti alla marina.

Si po’ ‘nu piattu puorti ‘e cullurella,
i nuozzuli de puorcu d’ ‘A Ricella,
crucette e fficu sicche d’ ‘u casciune,
passamu ‘na sirata de barune.

Ccu ttuttu stu mangiare c’ȃmu fattu
‘u miedicu ‘un ne serbe all’intrasatta.
Anzi, ‘u sapiti chillu ca ve dicu?
“Miedici e mmedicine mi nde fricu”.

Chjudimu, cari amici, ccu ‘i saluti,
ca pane e binu ‘u stomacu hȃnu inchjutu,
e b’aguramu n’ annu ‘e cuntentizze
e cc’ogne jjúornu ‘a manu ‘u fuocu attizze!

Dopu chista mangiata e lla vivuta
ve dugnu ‘a bonanotte ccu ‘nnu vutu:
‘n’ atr’annu tuornu cca ccu lla curuna
e b’àguru ppe mmo’ bona furtuna.

Ajíellu Calabru, ‘u trenta de dicembre d’ ‘u duimilaebintidui
Franco Pedatella