di Franco Pedatella
Stu testu è nnatu mentŗe ‘nu momentu fa, chjudìendu ‘a finestŗa, fore ‘a via haju ‘ntisu minare ‘u vientu.
‘A casa è ‘nnu ricuogliu quand’ è biernu
e ffore acqua e bientu fanu ‘a giostŗa;
‘a ‘state è ‘nnu riparu allu calure
ca fore vrusce ppella, terra e cchjante.
Quandu de quatŗariellu ‘u focularu
tutt’ ‘a famiglia ‘ntuornu ricoglíe,
supra i jinocchja ‘e nannu, nanna e ppatŗe
belle filette i pešcari sentíenu
e i fatti d’ ‘a famiglia se ‘mparave
ognunu e ccussí grande se facíe,
mentŗe tŗa fuocu e ttavula fujíe
‘a mamma ppe appruntare a ttutti ‘u piattu.
Quand’ ‘u mangiare ere ccucinatu,
chine stave alla tavula sedutu,
chine supra i jinocchja avíe llu piattu
ppe sse scarfare allu fuocu vivu.
‘Nzuppave ognunu ‘u pane dintŗa ‘u brodu
e ssapíe buonu, ch’ere ggrazia ‘e Diu.
Ccussí chjudíe lla jurnata santa
‘m pace ccu ppanza ed anima ‘a famiglia.
S’ere Nnatale, úocchji ‘e quatŗarielli
ridíenu tŗa grispelle e cculluríelli,
mentŗe frijíendu ‘u baccalà ‘a frissura
schicciave ll’uogliu a ttuttu ‘u focularu
e šchettiandu l’ašche e lli tizzuni,
‘m mienzu alla fiamma viva chi sumave,
facíenu ‘nu concertu ‘a ppercussione
ca ‘u core zumpettiave a nnui guagliuni.
Commenti
Posta un commento
Salve. Grazie per il commento.
Il curatore del Blog fa presente che non è responsabile per quanto pubblicato dai lettori. I commenti offensivi o lesivi dell’immagine o dell’onorabilità di terzi, di genere spam, razzisti o contenenti dati personali non conformi al rispetto delle norme sulla Privacy, verranno cancellati.